Izet Mexhiti nga VLEN sot në Çair tha se kreut të VMRO-DPMNE-së, Hristijan Mickoskit për formimin e qeverisë i duhet partner shqiptar, pasi në koalicion ka nga të gjitha bashkësitë e tjera etnike, përcjell TV21.
Mexhiti tha se për momentin, i vetmi koncept i pastër shqiptar në politikën në RMV, është VLEN.
“Edhe marrëveshja e majit që u nënshkrua në vitin 2007, kërkonte, aty qëndron, fituesi te shqiptarët dhe fituesi te maqedonasit të formojnë qeveri të re. Tani mendoj se BDI e ka thyer këtë, sepse nuk është koncept shqiptar, por hyri në koncept multietnik, në koncept qytetar, gjithë këtë e bëri pas 22 viteve, të shpëtojë me votat e turqve, boshnjakëve dhe legjitime ishte ajo, por tani nuk mund të thirren se i përfaqësojnë shqiptarët në Maqedoni. Koncept i pastër shqiptar është VLEN dhe normalisht që Mickoski ka turq, boshnjakë dhe bashkësi tjera etnike në koalicionin e VMRO-DPMNE-së, për të qenë fotografia e plotë, atij i duhet partner shqiptar, partner shqiptar për momentin është vetëm VLEN”, deklaroi Mexhiti.
Duke komentuar refuzimin e partive maqedonase që të formojnë qeveri me BDI-në, Izet Mexhiti nga VLEN tha se të gjithë nga BDI ikin sikur nga virusi korona, përcjell TV21. Mexhiti tha se BDI do të shkojë në opozitë.
“Ditëve të fundit nga BDI të gjithë ikin sikur nga korona. Nga BDI ikë edhe VMRO-DPMNE, nga BDI ikë edhe Maksim Dimitrievski, nuk dëshiron qeveri me ta, nga BDI siç e shoh edhe ish-kryeministri Kovaçevski është hidhëruar sepse në mënyrë jokorrekte luajtën edhe me të. Edhe LSDM nuk do me BDI-në. Kështu që duket se BDI do të mbetet në opozitë me Levicën dhe pikërisht atë që e thanë, do të thotë me forcat pro-ruse”, theksoi Mexhiti.
