VMRO-DPMNE i ka kërkuar sot Qeverisë dhe kryeministrit Dimitar Kovaçevski që ta dorëzojnë në Kuvend, nismën për ndryshimet kushtetuese, për të vërtetuar se a i kanë ose jo 2/3 e votave.
“Presim që ai të dorëzojë dorëheqjen menjëherë pas votimit në Kuvend, kur të konstatohet se qeveria nuk ka shumicë prej dy të tretave e me këtë të mos ketë as kushte për fillimin e procedurës për ndryshimin e Kushtetutës. Kot zvarriten, kot mbjellin mjegull, kot blejnë kohë. Në këto kushte dhe në një diktat të tillë nuk do të ketë ndryshime kushtetuese sepse VMRO-DPMNE dhe populli nuk do ta lejojnë”, thuhet në reagimin e VMRO-DPMNE-së.
Por LSDM ka theksuar se Mickoski duhet të tregojë nëse ka zgjedhur bllokun e BE-së apo bollkun e Levicës.
“Mickoski prej javësh nuk ka dhënë përgjigje dhe nuk u ka treguar qytetarëve se çfarë ka vendosur, a do të hyjë në bllokun evropian apo do të mbetet i izoluar me Dimitar Apasiev në bllokun antievropian. Në vend të kësaj, Mickoski, si zakonisht, vendosi të publikojë gënjeshtra të reja, mjegullnajë të re me të cilat mundohet të mashtrojë opinionin maqedonas… Mickoski duhet ta dijë se bllokimi i rrugës evropiane, përveç që do të rrezikojë të ardhmen e vendit, pozitat ndërkombëtare të shtetit, do të ndikojë negativisht edhe në marrëdhëniet me SHBA-në”, thuhet në reagimin e LSDM-së.
