Mbrëmë në Beograd është mbajtur protesta e dytë “Serbia kundër dhunës”, e organizuar nga disa parti opozitare.
Pjesëmarrësit e protestës marshuan rrugëve të Beogradit me pankarta “Fike RTS-në, ndize trurin”, “Informatori është gënjeshtër”, por edhe duke thërritur “Vuçiq, ik”.
Organizatorët kërkojnë mbylljen e mediave të shkruara dhe tabloideve që promovojnë urrejtje dhe dhunë dhe shkelin vazhdimisht kodin gazetaresk, si dhe, siç deklaruan, tërheqjen e frekuencave kombëtare të televizioneve (që promovojnë dhunën) si Pink dhe Happy TV.
Ata kërkuan gjithashtu “heqjen e programeve që nxisin dhunën, imoralitetin dhe agresionin në televizionet kombëtare, si reality show-t”.
Gjithashtu u kërkua shkarkimi i ministrit të Arsimit Branko Ružić (i cili dha dorëheqjen), ministrit të Punëve të Brendshme Bratislav Gasić dhe drejtorit të Agjencisë për Siguri dhe Informacion Aleksandar Vulin. Protesuesit kishin edhe kërkesa tjera.(INA)