Së paku 6 persona, mes tyre disa nxënës, një mësues dhe një roje, janë vrarë sot në shkollën “Vladislav Ribnikar” në lagjen Vraçar të Beogradit, raportoi pak më parë portali serb Nova.rs.
Vrasja është kryer nga një 14-vjeçar dhe sipas informacioneve të kësaj media, ai ka hyrë me armë në një klasë ku po zhvillohej ora e historisë dhe ka hapur zjarr ndaj nxënësve, pasi fillimisht ka qëlluar për vdekje mësuesin.
Tre fëmijë janë shtruar në Klinikën Universitare të Fëmijëve në kryeqytetin e Serbisë, dy prej të cilëve janë në gjendje stabile, por një fëmijë është ende në gjendje kritike, transmeton portali Nova.
Jozyrtarisht janë mbi 10 nxënës të plagosur me armë zjarri, të cilët janë dërguar në Qendrën Emergjente.
Viktima e parë e sulmit ishte roja e shkollës, i identifikuar si Dragan, i cili vdiq nga plagët e marra pak pasi u qëllua.
Para shkollës “Vladislav Ribnikar” janë dërguar disa automjete të emergjencës në përpjekje për t’u ndihmuar fëmijëve të plagosur.
Pas kryerjes së krimit, 14-vjeçari, gjithashtu nxënës i shkollës, u largua me vrap por u arrestua menjëherë nga policia.(INA)