Ekipet e LSDM-së dhe Aleancës për Shqiptarët thonë se janë në finalizim të negociatave për zgjerimin e koalicionit qeveritar. ASH theksoi për MIA se edhe mbrëmë grupet e punës kanë qenë në diskutime intensive, pas së cilës me siguri do të dihet saktësisht se cilat funksione do të marrin.
ASH pretendon se “tashmë është marrë vesh me Ministrinë e Shëndetësisë dhe të Drejtësisë që ato të menaxhohen nga kuadri i Aleancës, departamente që aktualisht janë në duart e Alternativës dhe LSDM-së”, raporton MIA, duke u thirrur në burime pranë kësaj partie.
Nga atje thonë se ende po negociohet për resorin e tretë ministror.
“Grupet e punës punojnë me intensitet të lartë për të mbyllur të gjitha çështjet që janë në tryezën e bisedimeve. Ka marrëveshje, ka përafrime, por ka edhe mosmarrëveshje për disa çështje. Negociatat vazhdojnë derisa të mbyllen të gjitha temat”, thanë për MIA-n nga Aleanca për Shqiptarët.
Marrëveshjen zyrtare mes Dimitar Kovaçevskit dhe Arben Taravari pritet ta bëjnë personalisht pas takimit final, që ende nuk është caktuar, por siç thonë ata, pritet të ndodhë shumë shpejt. (INA)