Rusia për herë të parë zyrtarisht kërcënoi Britaninë me sulme në territorin e saj.
“Nëse Ukraina përdor raketa të furnizuara nga Britania e Madhe për të sulmuar Rusinë, kjo mund të rezultojë në sulme ruse ndaj objektivave ushtarake në Mbretërinë e Bashkuar dhe jashtë Ukrainës”, tha Ministria e Jashtme ruse.
Ambasadori britanik Nigel Casey u thirr në Ministrinë e Jashtme ruse në një notë zyrtare proteste pasi Sekretari i Jashtëm britanik David Cameron tha se Ukraina kishte të drejtë të përdorte armët britanike për të sulmuar territorin rus. Ministria e Jashtme ruse tha se deklarata e Cameron do të thotë se Britania praktikisht e ka pranuar se është pjesëmarrëse në luftën në Ukrainë.
“Casey u paralajmërua se në përgjigje të sulmeve të Ukrainës në territorin rus me armë britanike, të gjitha instalimet dhe pajisjet ushtarake britanike në tokën ukrainase dhe jashtë saj mund të bëhen objektiva”, thuhet në deklaratë. “Ambasadori është i ftuar të mendojë për pasojat e pashmangshme katastrofike të lëvizjeve të tilla armiqësore të Londrës dhe të refuzojë menjëherë dhe në mënyrë të prerë e pa mëdyshje deklaratat luftarake dhe provokuese të ministrit të Punëve të Jashtme”, shkruan Ministria.
Kujtojmë se ministri i Jashtëm britanik David Cameron tha javën e kaluar se Ukraina duhet të vendosë se si të përdorë armët britanike dhe theksoi se Kievi ka të drejtë të synojë objektiva në territorin rus.
Zakharova: Kjo është dëshmi se Perëndimi po bën luftë kundër Rusisë
Gjatë një vizite në Kiev, ai tha se Britania do t’i jepte Ukrainës 3 miliardë paund (rreth 3.5 miliardë euro) në vit, sipas nevojës. “Ashtu si Rusia po sulmon brenda Ukrainës, ju mund të kuptoni pse Ukraina ndjen nevojën për të siguruar mbrojtjen e saj”, tha Cameron.
Ministri i Jashtëm i Britanisë, i cili u takua me Presidentin Volodymyr Zelensky në Kiev, tha se Rusia kishte nisur një sulm ndaj Ukrainës dhe Ukraina kishte “të drejtën absolute për të goditur Rusinë”.
Zëdhënësja e Ministrisë së Jashtme ruse Maria Zakharova tha të premten se deklaratat e sekretarit të jashtëm britanik ishin një pranim se Perëndimi po bënte luftë kundër Rusisë duke përdorur “duart ukrainase”.
“Fjalët e Cameron janë një tjetër dëshmi e luftës hibride që Perëndimi po bën kundër vendit tonë”, tha Zakharova. “Rusia po i përgjigjet kësaj dhe do të vazhdojë të përgjigjet. Zëdhënësi i Kremlinit Dmitry Peskov theksoi se ky është “një përshkallëzim i drejtpërdrejtë i tensioneve rreth konfliktit ukrainas, i cili potencialisht përbën një kërcënim për sigurinë evropiane”.
