Në Gjykatën Themelore në Tetovë sot në mesditë duhet të shqiptohet aktgjykimi për të akuzuarit në rastin e zjarrit në spitalin modular që ndodhi më 8 shtator 2021 ku humbën jetën 14 persona.
Më 29 maj u prezantuan fjalët përmbyllëse të Prokurorisë dhe avokatëve të të pandehurve, me të cilat u mbyll seanca kryesore dhe gjykata vendosi që aktgjykimi të shpallet të hënën më 5 qershor.
Ish-drejtorët e Spitalit klinik të Tetovës, Florin Besimi dhe Artan Etemi, akuzohen për veprën penale “vepra të rënda kundër sigurisë publike”, ndërsa mjeku Boban Vuçevski për “mosrespektim të rregullave shëndetësore gjatë epidemisë”. Spitali klinik si person juridik akuzohet për dy vepra, së pari për “shkaktim rreziku publik” dhe “mosrespektim të rregullave shëndetësore gjatë epidemisë”.
Në fillim të gjykimit, të pandehurit deklaruan se e kuptojnë akuzën, por se nuk ndihen fajtorë. Gjyqi filloi në dhjetor të vitit të kaluar. Një grup qytetarësh që organizohen përmes rrjeteve sociale kanë paralajmëruar protestë paqësore për sot në mbështetje dhe kërkesë për lirim të mjekut Boban Vuçevski.
Në fjalën përfundimtare, avokatët e të pandehurve theksuan se Prokuroria nuk e vërtetoi fajësinë. Përfaqësuesit e Prokurorisë theksuan se me provat dhe dëshmitë e paraqitura të pandehurit kanë kryer krimet dhe kanë kërkuar nga gjykata shpalljen e tyre fajtorë. (INA)