Mbështetje në zgjedhjet parlamentare të tetë majit kërkoi Fronti Europian nga mbështetësit e tyre nga tubimi i mbrëmshëm përmbyllës në sheshin “Iliria” në Tetovë. Duke folur secili kryetar i partisë veç e veç, disa prej tyre nuk kursen edhe fjalë më të ashpra ndaj oponentëve të koalicionit VLEN. Pula mbetet pulë edhe nëse ia vendosë krahët e shqiponjës, tha Arjanit Hoxha.
Ka një thënie popullore: Pula mbetet pulë edhe nëse i’a vendosë krahët e shqiponjës. Prandaj, të dashur vëllezër dhe motra, mos të lejojmë që këta në opozitë, me ndihmën e Mickoskit t’ua presin krahët shqiponjave por më 8 maj, të japim mesazhin e fuqishëm, goditjen e fundit, duke i treguar se as klithjet e Bilall Kasamit e as zëri i bretkocës nga bunari i Afrim Gashit e as ata të tjerët që i ndryshojnë qëndrimet pesë here brenda ditës, nuk mund të ndalin vullnetin e shqiptarëve”, deklaroi Hoxha.
Menduh Thaçi shkoi edhe më thellë, duke i quajtur moçal politik.
“Para jush përshëndes personin i cili në zgjedhjet presidenciale, me votën e vet, xhunglën politike të VLEN-it, e sakatoi dhe e bëri moçal politik, Bujar Osmanin. Unë e siguroj z.Bujar Osmanin se unë jam ekspert për dezinfektimin e moçaleve, si baktere, parazitë dhe virusë të ndryshëm”, tha Thaçi.
E ndaj këtyre fjalëve reagoi kreu i Lëvizjes Besa Bilall Kasami. Në Facebook profilin e tij Kasami thotë se nuk do t’i shajë ata ashtu siç janë sharë mes vete në të kaluarën. Vota për hajdutët, thotë se nuk llogaritet si vote shqiptare.
“Edhe po të dua t’ju shaj, unë nuk e shaj dot Aliun aq rëndë sa Menduhi e Ziadini. As Menduhin s’e shaj dot aq poshtër sa e ka sharë Aliu e Ziadini. As Ziadinin nuk e shaj dot aq fëlliqur sa e ka sharë Menduhi e Aliu. Jo o paterica të BDI-së, unë as nuk shaj, as nuk dhunoj, por unë si kryetar i Tetovës që e fitova kur ju e kishit lënë me zero investime, ju them me plot bindje. Vota e shqiptarëve nuk është votë për hajdutët, Vota për hajdutët nuk llogaritet dot si shqiptare”, reagoi Kasami.
Përndryshe në po të njëjtin shesh në Tetovë sonte e ka tubimin përmbyllës koalicioni VLEN. Fillimisht dy taboret kishin caktuar tubimet përmbyllëse në të njëjtën kohë, por më pas Fronti Europian u tërhoq dhe e organizoi atë një ditë më herët.
