Anketa e fundit multinacionale për Ballkanin Perëndimor e realizuar nga Qendra për Kërkime Insights (CISR) e Institutit Republikan Ndërkombëtar (IRI) tregon mbështetje të gjerë për anëtarësimin në Bashkimin Evropian (BE) dhe një shumicë të fortë që e shohin luftën e Rusisë kundër Ukrainës si të pajustifikuar.
Sondazhi, siç njoftohet në faqen e saj të internetit IRI, është kryer në gjashtë vende të rajonit: Shqipëri, Bosnje dhe Hercegovinë (BiH), Kosovë, Maqedoninë e Veriut, Mal të Zi dhe Serbi.
Në pyetjen nëse do të mbështesnin anëtarësimin në BE nëse do të mbahej një referendum sot, në pesë nga gjashtë vendet një shumicë e fortë do të votonte për anëtarësimin në Union, nga 68 për qind në Maqedoninë e Veriut dhe Bosnje-Hercegovinë në 92 për qind në Shqipëri. Në Serbi, më shumë se 40 përqind e të anketuarve mbështesin pranimin në BE.
“Ka një dëshirë të fortë në të gjithë Ballkanin për të forcuar lidhjet me ekonomitë perëndimore dhe për t’u anëtarësuar në BE”, thekson Paul McCarthy, drejtor për Evropën në IRI.
Ai shton se kjo mbështetje e gjerë tregon se njerëzit në mbarë rajonin besojnë se integrimi i mëtejshëm në Bashkimin Evropian mund të ndihmojë në arritjen e prosperitetit të qëndrueshëm.
Sondazhi zbuloi gjithashtu se shumica në pesë nga gjashtë vendet e anketuara besojnë se lufta e Rusisë kundër Ukrainës është plotësisht ose disi e pajustifikuar. Në Serbi, nga ana tjetër, një shumicë prej 49 për qind e justifikon plotësisht ose disi Rusinë.
Sondazhi u krye në emër të Qendrës për Vështrime Kërkimore të IRI-së midis 2 shkurtit dhe 5 marsit 2024.(INA)