Azir Aliu nga Aleanca për Shqiptarët ka theksuar se ka fakte kur BDI-ja ka qeverisur pa asnjë kush për shqiptarët me VMRO-DPMNE.
Sipas tij, marrëveshja mes BDI-së dhe VMRO-së parashihte që të mos hapet për katër vite asnjë çështje me siglën etnike, të mos ndryshohet ligji për flamurin kombëtar shqiptar dhe shumë çështje tjera.
“Në vitin 2008, Bashkimi Demokratik bëri koalicion me VMRO-në pa asnjë kërkesë. Dhe kjo vërtetohet nga deklarata e Ilija Dimovskit i cili thoshte: Ramë dakord me BDI-në që të hyjmë në koalicion me këto kushte që gjatë mandatit katër vjeçar të mos kërkohet bashkimi i komunës së Kërcovës me komunën e Osllomej dhe Zajazit. Çështjet që lidhen me siglën etnike të mos hapen gjatë katër viteve të ardhshme. Pastaj thotë çështja e statusit të viktimave të luftës së vitit 2001 do të bëhet në kuadër të ligjeve ekzistuese dhe pasi të zbatohet në tërësi programi i VMRO-së: Rilindja në 100 hapa 2008-2012. Nuk do të ndryshohet ligji për flamurin kombëtar të shqiptarëve etj”, është shprehur Aliu në Clickplus. (INA)
