Ministria e Drejtësisë e Maqedonisë së Veriut njofton se ka marrë njoftim zyrtar nga autoritetet turke se lejohet ekstradimi i Ljupço Palevskit.
Palevski ndodhet në paraburgim ekstradimi në Turqi, ku u ndalua nga autoritetet lokale me urdhër.
Pas sjelljes së tij në vend, Palevski sipas vendimit të gjykatës do të mbahet në një institucion penal, ndërsa procedurat para organeve të drejtësisë vazhdojnë.
Ai është i dyshuari kryesor për vrasjen e 14-vjeçares Vanja Gjorçevska dhe Pançe Zhezhovskit nga Velesi. Katër persona të tjerë dyshohen për vrasjet, mes tyre edhe babai i të vrarës Vanja, i cili u la në arrest shtëpie javën e kaluar.
