Punëtorët shëndetësorë sot nga protesta para Ministrisë së Shëndetësisë kërkuan nga partitë politike që pretendojnë të vijnë në pushtet, të ulen me sindikatat në një tryezë të përbashkët dhe të bien dakord në letër se çfarë premtojnë në programet parazgjedhore dhe pastaj ta zbatojnë atë.
Nëse nuk plotësohet kërkesa për nënshkrimin e Aneksit të Marrëveshjesë Kolektive për rritjen e rrogave, punonjësit e shëndetësisë kanë paralajmëruar protesta më masive.
Sipas tyre, nëse deputetët dhe ministrat kanë rroga evropiane, atëherë rroga të ngjajshme duhet të ketë edhe punonjësit shëndetësor.
Punonjësit shëndetësor theksuan se nëpër spitale tanimë ka deficit të të punësuarve, të kuadrit profesional, kushte katastrofale dhe spitale të pandërtuara.
Arif Ibrahimi nga Sindikata e Punëtorëve Shëndetësor të Tetovës theksoi se vetëm në Spitalin Klinik të Tetovës ka mungesë të të 400 të punësuarve, për të pasur shërbime optimale për pacientët dhe kryerjen e detyrave.
Suzana Atanasovska nga sindikata e Kumanovës theksoi se punonjësit shëndetësor përballen me sigurimin e kushteve elementare jetësore.
Të dhënat e fundit nga kjo sindikatë thonë se punonjësit shëndetësor vazhdimisht po braktisin vendin në mungesë të kushteve dhe se numri i tyre që largohet çdo vit është nga 200 -250 mjekë dhe punonjës shëndetësor.(INA)
